Pu Lalchhandama chuan, “Independence Day-a Chief Minister Pu Lalduhoma thusawiah khan thudik zik tluak lo leh zirtirna dik lo a tam hle a. I-Day heti zat kan hman tawhah CM-ten kalphung awmsa hmangin - Inlawmna te, hnam pasaltha zahna te, state hmasawnna te, chona hmachhawp te, future vision te, inpumkhatna leh tanrualna thute an sawi thin.

“A thusawi dan kha a dangdai hle a, keimah ngeiin ka buatsaih a tihte hi a dik em? Zawhna lian tak a awm a ni,” a ti.

“Pu Duhoma’n leiba ₹ 13,584.80 Crore neiin bul kan tan, tia a sawi kha ZPM sorkar hma kum 2023-24 BE figure a ni. RE-ah ₹12,709.29 Crore a ni zawk (hei hi GSDP atangin 32.29% a ni). Finance Commission 15-nain leiba neih a phal chin bituk (33.1%) aiin a hniam.

“Kum 2024-25-a ZPM Sorkar Budget pharh hmasa berah leiba zat chu ₹14,034.76 Crore a ni - RE-ah 38.32% of GSDP a ni. Hei hi FC 15-nain leiba neih a phal chin (32.8%) a khum hial zawk a ni.”

Pu Chhantea chuan, “Kan puk ve dawn lo an tih laiin an sorkar tuk atanga kumin June thla thleng (thla 19 chhung) khan source hrang hrang atangin ₹ 6214.27 Crore an puk tawh,” a ti a. “Kum 2023 (Dec)-ah ₹ 378.38 Crore, Kum 2024 chhungin ₹ 4301.88 Crore (puk theih zat ₹ 1037 Crore) leh Kum 2025 (upto June)-ah ₹ 1534.01 Crore (puk theih zat ₹1,807 Crore) an puk tawh a ni. Kum kal mekah hian an puk theih zat atangin 84.89% an puk tawh,” a ti.

“Year of consolidation an puang chungin an puk nasat lutuk avangin Covid-19 (2021–22) lai tih lovah chuan ‘revenue deficit’ hial a thleng. Kum 2007-08 hnu lamah revenue deficit a la awm ngai lo. Financial management thiam, kan puk ve dawn lo titute hian an puk hnem a ni,” a ti.

Leader of Opposition chuan, “Kum 2024-25-ah Opening Balance ₹ 520.65 Crore neia insawi hi kumin RE-ah ₹ 156.66 Crore a ni zawk. Kumin 2025-26-ah Opening Balance ₹ 1099.93 Crore neia insawi phei hi chu Budget bu kan keu chuan Minus ₹ 1425.69 Crore zet a lo ni zawk si. A zahthlak hle. Awm ngaihna hriat a har a, awm loh ngaihna pawh hriat a har a ni,” a ti a. “Central sorkar atanga an puk tling khawm, a huna release lohte kha budget surplus anga sawi a nih hmel. Mithiamte pawhin kum hlui unspent balance/unutilised balance kha surplus/saving an ti ngai lo,” a ti bawk.

“Contract hna Departmental Works thawh leh Restricted Tender chungchangah pawh hmanni lawka blanket approval ₹ 629.17 Crore an pekte kha kan ti ve lo ang titute hian sum bawm an zen nasa fe zawk tih a tichiang hle a. CM hian PMJVK, Tax-Finance, District Council, CSR zawng zawng a hnuaiah a lakhawm vek a. Minister/MLA-te tan tlawn loh theih lohin a inhung tawh a, tunah chuan Super CM a ni mek tawh a ni.”

Corruption do dan kalphung thar sawiin Pu Chhantea chuan, an sorkar atanga ni 15 chhungin CBI consent an pe a. Mahsela, thla 6 hnu lekah CBI consent hi an sut leh nghal a. CBI consent an sut leh thu hi kan CM hian a sawi duh miah lo a ti.

“I-Day-ah khan kawng chhia sawi a hnekin, Central-in an mi duh tak NHIDCL Exe. Director min rawn pe a, a lawmawm hle. Tin, NHIDCL managing Director-in Delhi-ah min rawn hmu a tihte hi a mak a, ram mipui hmaa sawi tham a ni lo. NH 302 - Tlabung atanga Demagiri chu NHIDCL kutah hlan a ni ang, a tihte hi Demagiri hi Tlabung tho, Tlabung hming hlui a ni.”

Pu Chhantea chuan, I-day speech chu intih kalphungtharpui chi a nih loh thu leh Pu Duhoma thusawi chuan x-ray a dawl lohzia a sawi bawk a ni.

Chhung inkhawm hi  MS Dawngliana, Adviser MNF GHQ-in a kaihruai a, Lalramliana, Speaker, Gospel Thunder Team-in hunserh a hmang.